吳綺莉（Elaine）的女兒卓林與網紅Andi婚後返港，一直在外租住地方，靠賒借度日，Elaine昨日寸爆Andi不務正業，口說有愛但唔搵工做，四圍向她的朋友借錢，嬲爆的她提早幫「媳婦」開年！
曾經離家出走到多倫多的卓林，去年11月與網紅Andi於溫哥華註冊結婚後返港，因冇錢交租被迫遷，最後由吳綺莉接濟。雖然母女「團聚」，但關係繼續時好時壞，仲話要「磨合期」！Elaine昨日突然在社交網上載Andi的性感舊照，除了有Andi露出東西半球與兩名男友人合照外，還有其為網上商店示範的水着相，當中亦有去年4月卓林求救的對話截圖，上面寫着「I am in danger（我有危險）」似乎意有所指！她並以英文留言，意謂：「施比受更有福，親愛的，新年快樂，祝你萬事如意，免費午餐和自由戀愛。」
Elaine突然「有感而發」，原來是一番晦氣說話！她昨晚受訪時寸Andi不務正業，還呻爆女兒向她朋友借錢，欠下人家不少人情：「Andi同我個女周圍租地方住，又冇錢交租，要問勻晒我啲朋友借錢，人哋唔係白幫o架，幫都有限度，唔想欠人太多人情！（你有冇出手？）梗係有！其實我個女得19歲，又冇讀書，佢哋都可以搵份工啫，餐廳侍應都係一份工，職業無分貴賤！（佢哋唔肯搵工？）佢（指Andi）同我講當年教幼稚園月入30幾萬，佢話患有人群恐懼症，唔可以隨便搵一份要面對多人嘅工！」
嬲爆的Elaine還稱女兒向她求救要幫Andi，她無奈說：「我個女震晒咁同我講，話覺得自己辜負咗太太，搞到佢咁，叫我幫佢，咁我係咪要幫佢籌錢畀佢醫病？公立醫院唔知有冇得睇呢種恐懼症呢？」雖然寸Andi，但Elaine亦感激出手幫卓林的朋友：「都係我唔好，冇好好教女，謝謝所有朋友嘅幫忙！」