陳瀅嘔落墳頭仲話係趣事？！
藝人陳瀅前晚出席劇集煞科宴，自爆曾因身體不適在墓地拍攝時嘔吐大作，意圖岔開被追問與陳家樂的緋聞！自稱現時單身的她，強調不會帶家樂回溫哥華探親。
無綫劇集《黃金有罪》演員姚子羚、陳瀅、洪永城、蕭正楠、張兆輝及黃智賢等前晚出席煞科宴，講到農曆新年將至，陳瀅透露會返溫哥華探親，問到是否帶緋聞男友陳家樂去見外婆？她笑說：「一個人去咋！依家單身冇男友，戲裏面嘅男友就係洪永城。」姚子羚笑說：「陳家樂外形好過洪永城喎！」陳瀅為了避談緋聞，竟揚言發生了件「趣事」，指拍攝時試過身體不適嘔吐大作：「有場戲喺墓地拍攝，當時身體唔舒服，忍唔住嘔喺墳墓度，惟有係咁講對唔住！」
姚子羚盼機上情緣
而姚子羚則說：「我都拍咗好多淋雨戲，又喺山頂吹風，去到尾聲終於病咗，依家至好番咋。」她又透露農曆新年會與吳卓羲到加拿大登台：「我哋會合唱《誰令你心痴》，但唔知佢會唔會唱《別怪他》，都開心嘅，最少有個男仔陪我喺外地過新年。」問到可心急找男朋友？她笑說：「隨緣，再講好似好心急咁，可能飛機上遇到呢，或者叫妹妹（陳瀅）介紹畀我囉！」陳瀅聞言顯得一臉尷尬。
張兆輝滑雪度新歲
張兆輝表示會到郵輪登台搵真銀，隨後與太太前往意大利滑雪度假，笑言：「滑雪消耗好大，去度假都唔怕肥，返嚟香港會再操番，3、4月就要拍電影。」問到女兒會否同行度假？他說：「唔會，佢喺英國讀書冇假期。」又指一直掛念在外地讀書的兒女，每次送機也感不捨。