湛琪清爆阿爸：鍾意女婿多過我
汪詩詩表妹湛琪清（Jessica）早前獲男友驚喜求婚，令她感動爆喊，她稱男友深得其父母歡心，笑言父親給男友一百萬分，兩人預計今年拉埋天窗，之前更在歐洲拍了一輯唯美婚照。
湛琪清早前獲拍拖兩年的圈外男友在峇里求婚，她坦言事前毫不知情，完全沒想過是求婚之旅：「因為最初係我同男友、男友細佬三個人一齊去峇里，後來細佬因為護照問題入唔到境。」
講到求婚過程，她甜絲絲說：「喺酒店登記時，職員問我係咪Blogger，話可以安排我哋上一個雞尾酒課程，我本來想拒絕，但男友一口答應咗，原來呢個課程係男友特別安排，因為我好鍾意飲雞尾酒，同埋我哋第一次見面就係飲雞尾酒。」
求婚第一句答No
直至侍應叫Jessica打開一個盒子，她見到盒內的戒指才恍然大悟：「男友單膝跪地求婚，佢同我講咗好多嘢，但我一句都聽唔到，我第一句係答：『No，我今日個樣好肉酸』，因為我又感冒又冇化妝，又不停喊。」她稱身在美國的家人早知男友會跟她求婚，當日他們捱眼瞓至凌晨4時等她的好消息：「我男友之前暗中約咗我父母出嚟，問准佢哋先同我求婚，爸爸好鍾意我男友，畀佢一百萬分，鍾意佢多過鍾意我，佢一直都好想生個仔，但就得兩個女。」
港美兩邊擺酒
Jessica透露計劃今年結婚，早前更到意大利旅行兼拍攝婚照，全程由男友安排：「男友安排咗其中一日影婚照，凌晨4點就起身化妝。之後會喺香港再影，到時會着中式旗袍或者裙褂。至於擺酒都會分別喺香港同美國擺，因為我屋企人都喺美國住。」
場地：AMMO
服裝：Ted Baker