歌手鄭伊健昨日出席電台訪問，為2月24日舉行的6場紅館個唱宣傳，獲歌迷送上清酒及祈福禮物預祝大賣。他透露農曆新年會留港，又指該時間機票太貴，但被取笑大把錢：「係原則性問題！明明咁多錢，點解嗰個禮拜又貴幾倍，唔抵買囉！（變咗慳家男！）係唔想浪費！（新年過節會為個唱戒口？）都照食，依家健身訓練嘅理論唔同咗以前，可以食足三餐。」但會減少跑山及打羽毛球避免受傷：「喺屋企打機囉，或者陪太太去買餸。」
