陳凱彤睇舖一腳踢沖茶拉客
由肥妹仔減80磅入行做歌手、成為容祖兒師妹的陳凱彤（Lillian），已轉投新公司並推出國語歌攻內地，最近更雄心壯志進軍商界，斥六位數與友人合資在荃灣區開設台式飲品店，一嘗做老闆滋味。正所謂力不到不為財，她一有時間便落舖打躉，凡事親力親為，開舖前落力吸塵、拖地，相當注重清潔。開門後，她又要為客人收杯、抹枱，執頭執尾做阿四，樣樣做到足。
見年輕人即搭訕
下午放飯時間人流極旺，Lillian化身侍應負責接柯打，又親自為客人調製飲品，見她手勢相當純熟，看來事前下了不少工夫。顧客以年輕人為主，她亦主動與客人搭訕，交際手腕了得。
雖然全日做到冇停手，但放工時段她又再次出擊，拿着一大疊宣傳單張走到店舖外派發，多次食檸檬卻仍未有打擊信心，依然落力派傳單冧客！
