過Lonely Christmas湯怡與洪卓立保持聯絡
藝人湯怡及彭秀慧前晚到九龍灣出席活動，今年是湯怡與洪卓立分手後首個聖誕，難免傷感，但她似乎「康復」得不錯，更滿腹慶祝大計：「我上網訂咗一式五件唔同顏色嘅靚衫，會同4個閨蜜出去影相。加上姨甥仔唔使返學，打算成家人睇吓戲，其實都好多嘢可以做！」
問到是否已做好準備再次戀愛？湯怡直言暫不考慮：「想專注做吓嘢先。（好慢熱？）係，感情事要睇定啲，深入了解先會發展，不過其實做朋友只要熟咗，我都超級熱情o架！」又坦言與洪卓立仍是朋友，彼此有聯絡，多年感情不是一下子就能完全放低：「佢嚟緊會返內地開音樂會，我就會幫無綫拍劇，都10年冇拍過，到時好忙，只擔心冇得瞓！」
