榮升蕭太攤喺度江若琳專責造人
藝人江若琳（Elanne）前晚與「生煎包王」蕭潤邦（Oscar）辦婚宴，身上的重型金器成為全場焦點！兩人切完三層高的結婚蛋糕後，再360度自轉熱吻，更即場舉行頒獎禮，向兄弟團成員張繼聰頒發「2018年候選好男人」獎，阿聰卻說：「我想將呢個獎傳畀蕭潤邦，等佢發揚光大！」Oscar接過獎後多謝老婆，唱出《今生今世》示愛，令台下的Elanne感動落淚。
洞房花燭夜攰爆
新任蕭太Elanne昨日接受電話訪問時說：「原來啲金係咁重！有啲係奶奶同Oscar送畀我，行禮嗰套婚紗係法國布造，全身嘅水晶係人手逐粒縫上去，諗住啲嫁妝留番畀啲仔女。」問新婚夜可有趕緊造人？她坦言太累，Oscar又忙於執手尾至清晨，不過已做好準備趕生B！
提到Oscar驚喜獻唱，她透露《今》曲是兩人的主題曲，約定下世再做夫妻，又指做人妻後首要學習整齊：「有時我會唔記得閂櫃桶，家務由Oscar做晒，我多數都係攤喺屋企。」Oscar認為太太不做家務亦沒問題：「做開飲食界有潔癖，老婆舊年煮雞煲同肉骨茶，今年就烚過蛋同煮過公仔麵，但個煲係我洗番，依家睇個走勢，應該再少啲機會食佢整嘅嘢。」他心疼Elanne將來生B會很辛苦，如此體貼，難怪獲太太讚是超過100分的老公！
