秋官搵汪明荃做女版丁蟹
藝人汪明荃（Liza）和鄭少秋（秋官）前晚齊齊欣賞粵劇，秋官被問會否想同Liza拍住上做戲？他笑說：「可以傾吓，其實都係睇劇本，可以做情侶，話晒都談咗情咁多年，經驗豐富。」
提起《大時代》五蟹世紀重聚，可能有機會開拍電影版，秋官贊成Liza加入：「Liza就做女丁蟹，嚟個男、女丁蟹大鬥法！要問問韋家輝監製先，劉青雲就係我哋兩個生，咁先估你唔到嘛！周慧敏就係Liza帶返嚟，呃我話係我嘅，逼我娶佢！嘩！乜你哋當真o架？（你連劇本都諗好。）果然丁蟹上身！」Liza則揚言現時很少劇本適合自己，不想重複做媽媽鬧人角色。
