古天樂唔望攞獎獻Sing諗諗先

影帝古天樂、林峯、張敬軒、吳鎮宇、胡定欣、張曦雯及韓星車銀優等，前晚出席頒獎禮，獲頒「亞洲人氣演員」獎的古天樂表示今年是豐收年。對於入圍叱咤「我最喜愛的男歌手」五強，問到可期望得獎？他說：「冇諗呢啲，都唔係自己做開嘅嘢。（如果攞獎會唔會上台？）今年時間比較緊迫，睇時間。（會開金口唱歌？）諗吓先。」

林峯度期結婚

提到天后容祖兒及網民力推他攞獎，問到如何報答祖兒？古仔笑說：「下次同佢食飯獻唱一曲畀佢聽。（有冇練定歌？）我哋有唱K，佢好唱得，我就玩票性質玩吓。（你唱首本名曲？）我唔係好唱自己嘅歌，但佢哋就好鍾意點我嘅歌。（人哋點你唱？）唔好喇，撳伴唱咪聽到囉。」

軒仔笑言不想與姜濤合照，避免出現年齡差距。	姜濤	奪「人氣急星」獎的張曦雯勁風騷。

而林峯被揭與女友張馨月蜜遊日本，他笑言：「因為之前拍咗四部影視作品，自己都要抖氣，所以同身邊人、屋企人一齊旅行放鬆。（見埋家長？）記者朋友影到我會認，但唔會主動分享工作以外嘅嘢，總之依家生活非常好。（有時間辦喜事？）有喜事嘅，我細佬開咗新舖。（未到結婚階段？）未有期，度一度先，今年係我重新出發，工作量好大。」

軒仔姜濤有代溝

至於揮低男團MIRROR成員姜濤奪「人氣票王」獎的軒仔，表示有跟姜濤say hi：「我見到佢仲緊張，唔想佢揩咁埋，費事見到年齡差距。（你贏咗佢。）險勝啫，寒冬將至，為免老人家平安鐘長鳴，所以佢啲fans留手。」問到可有贈MIRROR幾句？他笑言：「冇呀，我發現我哋用字唔同，好似有代溝。」姜濤則說：「冇諗過自己會有第二，都冇留意投票，作為新人能夠畀人注意已經好開心，好開心張敬軒先生記得我，我好仰慕佢。」