洪永城冧女友：優點多到講兩個鐘！
藝人洪永城與長腿女模梁諾妍跑步跑出愛火花，昨日他冧笑回應戀事，大讚對方優點多到兩個鐘都講唔晒，但怕戀情太早曝光會嚇走對方。
現年35歲的洪永城（Tony）去年5月與唐詩詠甩拖，上月仍表示未有新對象，但原來極速「開Dry」，被本報獨家踢爆撻着模特兒兼長跑教練梁諾妍（Inez）！兩人日前於男方的西貢寓所度春宵後離開，雖然女方於8月時仍表示有一名拍拖兩年的男友，但Tony力撐對方應該是單身。Inez擁有長腿兼且是運動好手，是不少男士喜愛的類型，難怪Tony被讚「識食」！
暗示行埋幾個月
不再Dry爆的Tony昨日出席活動，春風滿面回應戀情，問到是否公開拍拖？他默認說：「了解中，畀啲空間！」但指戀情曝光嚇親Inez：「了解咗幾個月都順利，但畀記者影到之後有少少阻滯，佢有啲慌張，有少少嚇親。」並指是開心事，但問到女友是否在其家中過夜，他只說：「了解中，畀啲空間。（新聞見報後有冇聯絡？）有傾番，怕嚇親佢，你哋唔好嚇走佢，佢係好女仔。（邊方面吸引你？）好多方面！太多優點，要講一、兩個鐘，都有好多朋友恭喜我。（前女友唐詩詠都有！）係咩？多謝！（多唔多朋友知？）唔係好多人知，都係了解中，唔係周圍同人講，傳媒太神通廣大，冇辦法！」
至於Inez的經理人公司昨日回應時，同樣指兩人了解中：「畀少少空間佢哋，謝謝大家關心。」Inez昨日亦更新社交平台，但沒有提及感情事，只是高呼天氣寒冷：「多喝點熱熱的，不然傷身到尖叫。」