胡鴻鈞情歌冧女：對我好緊要嘅人！
胡鴻鈞（Hubert）與許廷鏗這段「同性密友」關係向來撲朔迷離，惟Hubert在騷上指身旁一直影響並啟發着自己的其實另有其人，而且是一名女性！雖然他怕醜形容二人關係是「亦師亦友」，但此番言論瞬間打破傳了多年的「斷背情」！
出道8年的Hubert前晚假會展舉行首個音樂會，除了老闆何哲圖外，獲一班老友力撐，包括許廷鏗（Alfred）、林欣彤、吳業坤、吳若希（Jinny）與老公、馬國明與女友黃心穎等，其中緋聞情侶蔡思貝及余德丞穿上灰色情侶裝，而《救妻同學會》眾演員亦有捧場。
以「白馬王子」打扮的Hubert突襲Fans，從觀眾席中央的小舞台驚喜現身，圓夢開騷的他興奮大叫︰「我終於開騷啦！差唔多30歲先開第一個售票音樂會，希望唔會太遲！」其後換上「黑騎士」Look的他，於演唱一段國語情歌Medley前，留下「伏筆」暗示想送給於身邊影響着自己的人。
肉搏女Dancer
好友Jinny及樂隊Dear Jane分別上台擔任嘉賓，其中Jinny大嗌緊張，獨唱《野孩子》連番出錯有失水準。全晚另一高潮落於Hubert與女Dancer「埋身肉搏」，任摸兼被掃胸，又不乏面貼面動作，見他亦盡力舞動身體，台下Fans尖叫連連！
騷後，問到那段情歌Medley的「收歌人」是否Alfred？Hubert否認：「係送畀佢就會指名。（入面有首歌《旅行的意義》，你哋唔係一齊去旅行？）係去咗旅行，但真係唔好意思，唔係送畀佢。」追問真實對象時，他繼續封口：「對我生命好緊要嘅人，但佢唔係呢行。（男定女？）係影響我好多嘅女仔，Keep住亦師亦友。（今晚有嚟？）應該有啩，有請佢。」講到破天荒跳舞部分，他信心爆棚指已完勝Alfred及吳業坤：「表情已經贏咗！但大家各有千秋。」問到被Dancer摸胸可有反應？他抵死反問：「佢哋有冇反應就真！（你有冇心跳加速？）覺得佢哋有心跳加速，加埋42吋胸肌喎！」