荷里活人氣女星「紫天椒」嘉兒莫蕊茲（Chloe Moretz）今年4月甩拖後，日前竟然被捕獲當街攬啜《花花公子》（Playboy）索模Kate Harrison，驚爆SheShe情！
嘉兒與碧咸（David Beckham）大仔布魯克林（Brooklyn）情海翻波幾度離合，男方4月被指偷食火辣女模Lexi Wood，與清純嘉兒的幾年情正式玩完，女方連月僅傳與《移動迷宮》（The Maze Runner）型男Dylan O'Brien過電，但都無疾而終！不過，嘉兒日前大送「驚喜」，於美國馬利布與成人雜誌《花花公子》模特兒Kate外出，身貼身密密斟之外，更情不自禁公然咀嘴，嘉兒一度旁若無人錫到落Kate頸，場面火辣，情路上似乎「轉向」！據悉二人當晚幫襯著名日本餐廳撐枱腳，再直落名人夜店狂歡，知情者爆出兩女於洛杉磯同居！
嘉兒向來力撐同志平權，兩位兄長亦是同志，她月前於訪問中講及：「我見過最健康嘅關係，唔係我父母，而係我哥哥同佢男友，已經拍咗11年拖！」至於她早前亦於電影《性教獄》（The Miseducation of Cameron Post）中飾演一名有同性戀傾向的問題少女。