陳庭欣保鏢唔易做單挑打十個
近年挑戰不同大膽角色的藝人陳庭欣（Toby），在熱播台慶劇《兄弟》飾演Cool爆保鏢，打戲連場，要一個打十個，成為新一代「打女」！事業愛情兩得意的她，自爆男友楊振源（Benny）對她很貼心，冧爆說：「從來冇人喺我身上做過呢啲嘢！」
向來予人斯文大方形象的Toby，近年接拍不少大膽角色，令人留下深刻印象，包括《踩過界》飾演跨性別人士「潘安」、《宮心計2深宮計》「王葭」和《迷》「蘇敏」等。身為前港姐的她毫無包袱，勇於嘗試不同角色：「唔想Set住自己有任何底線，早幾年都會驚，有時啲角色會唔會畀人感覺唔夠大方得體，驚影響自己司儀嘅形象，不過依家諗法唔同咗，明白觀眾會知道喺角色上嘅要求，唔畀個框框限住自己，畀自己嘗試多啲。」
動作戲呻攰
每個拍攝的機會，Toby亦視為學習經歷，她於《兄弟》中首演「打女」，做Cool爆保鏢的她坦言甚有挑戰：「第一次拍咁多動作戲，拍之前都接受過訓練，拍攝時要即場學唔同功夫，真係好緊張，仲緊張過做司儀。」她透露最難忘在英國拍攝的一場戲：「原本劇情係講我同何君誠同人對打，但係當時佢整親，成個英國之旅冇去到，所以變咗我一個打十幾個外籍人士，打到非常攰，因為要有動作之餘，又要配合鏡頭，有時可能我得，但鏡頭又捕捉得唔係好準，咁就來回拍咗好多次。」
讚男友細心
事業得意的她，早前大方承認與圈外男友Benny拍拖，更自爆對方好細心，令她非常窩心：「佢一向有戴錶嘅習慣，但我哋拖手嘅時候，佢為咗唔想隻錶整到我隻手，佢就會轉戴另一隻手，可能對其他人嚟講冇咩特別，但從來冇人喺我身上做過呢樣嘢，我覺得佢好體貼。」
場地：I,s land cafe