劉佩玥嘈到拆天累胡鴻鈞失聰

劉佩玥（前）與朱智賢玩遊戲時「鬼殺咁嘈」。

無綫劇《救妻同學會》演員胡鴻鈞、劉佩玥（Moon）、朱智賢、黃美棋及余思霆等，昨日到大角咀出席「救妻大特訓」活動，Moon玩遊戲時盡顯狼死本色兼嘈喧巴閉，被胡鴻鈞踢爆不止玩遊戲狠，開工時也非常「狼死」，她笑說：「我玩投入，做嘢更投入，要調劑吓生活。」

戴耳塞開工

胡鴻鈞爆Moon與朱智賢說話大聲，令他患上「職業性失聰」：「我同Moon合作《殭》已經喪失一成聽力，今次拍完《救》更加嚴重咗，冇辦法真係為藝術犧牲，奉勸同Moon合作嘅藝人要戴耳塞。我都想請教佢點樣可以咁中氣十足，把聲咁有穿透力，開騷有用。」Moon即指馮盈盈的聲音更勝一籌，胡鴻鈞亦笑言不敢與馮盈盈合作：「有次我喺廁所都聽到喺大門外拍攝嘅馮盈盈把聲。」

黃美棋變「前輩」

而黃美棋笑言經常一句KO愛搞爛Gag的胡鴻鈞，故被眾人封為「前輩」。又爆經常被胡鴻鈞以「小學雞」方法整蠱：「佢好曳，成日整蠱我，但經常被我發現，所以佢好有挫敗感，就更加想整蠱我，我就照辦煮碗報復。」

胡鴻鈞搞爛Gag，黃美棋即「頂佢個肺」。

余思霆（左）「鍊車」時玩到側晒身。