法拉驚男友「毒」阿媽

藝人陳法拉前晚出席聖誕亮燈活動,穿西裝褸透黑Bra亮相的她,透露剛從內蒙古拍戲回港:「嗰邊零下18度, 基本上出去企咗一陣已經冇晒感覺,帶去嘅暖包完全起唔到作用。(冇着羽絨?)有,但着乜都冇用,要着羊皮。(習慣咗凍?)過咗幾日就習慣,着晒打底褲上身,啲眼睫毛係凍到結冰。」

談到聖誕節,她表示會返美國陪伴家人:「好期待返去同屋企人過,媽咪煮嘢好味。(男友呢?)佢都會嚟。(叫男友煮畀媽咪食?)毒害媽咪就唔好啦,佢唔識煮嘢。我媽咪好勁,係一年365日都會煮飯畀Daddy食。(將來想似媽咪咁勁?)我希望係咁,又可以兼顧事業,將屋企打理得好。」