與黃子恆合作無綫新劇《機場特警》，飾演其母親的藝人楊玉梅，談到「兒子」被指搞大粉絲個肚，她坦言見對方開工時心事重重冇厘心機，又不禁語重心長，為他講好話：「覺得公司畀好多機會佢，人誰無過，佢係好好嘅演員，工作態度好，好準時，希望大家畀多次機會佢，畀機會改過，等佢好好反省。」
由於楊玉梅在《機》劇的戲份已在昨天拍完，與「兒子」離別前都有鼓勵對方：「我就拍到Last（最後一場）啦，所以臨走前都有鼓勵佢，叫佢努力啲，加油！不過，子恆個樣都好無奈，話唔知點（口架）！唉……畢竟都係後生仔，有單負面新聞，又係好慘嘅！」