Kawaii心郁矯視告別青蛙眼

藝人Kawaii為揭幕亮燈活動擔任司儀，她笑言睇《IQ博士》動畫長大，讀書時期是男同學眼中的「醜版小雲」，因她近視過千度，戴厚鏡片粗框眼鏡，雙眼放大儼如青蛙眼！她說：「當時都冇同學鍾意同我玩，後來自己諗，小雲都有咁多朋友仔喺天神村啦，我都可以嘅！我就笑多啲，多啲搵同學仔傾偈，跟住就畀老師誤會我多嘴囉！全靠性格鍾意傾偈，變到長大後就做到依家嘅工作。」提到有1,200度近視，可有考慮做矯視？她坦言心大心細：「有諗過呀，但朋友話要先唔戴隱形眼鏡兩星期，做手術時會有啲燶味同有啲燒嘅聲音，聽到我好驚呀，都係考慮清楚先！」