撻着陳家樂？陳瀅落閘求饒：似兄妹！
女神陳瀅（Jeannie）與男神何廣沛（Matthew）昨日出席東港城「IQ博士x珍寶珠聖誕嘉年華」揭幕亮燈儀式，Jeannie穿粉紅色連身裙亮相，自嘲是小雲最喜歡的「米田共」造型。而Matthew的緋聞女友朱晨麗剛度過「30+1」生日，他竟大膽說：「咁大喇咩？」
Jeannie、Matthew及鄺潔楹（Judy）擔任活動揭幕嘉賓，Jeannie表示最想過一個白色聖誕，Matthew則喜歡在家中食聖誕大餐。他覺得《IQ博士》動畫最經典的是由梅艷芳唱主題曲，並即興展歌喉唱了兩句，Jeannie則笑言觀其一身造型，就知道她最喜歡「小雲」愛篤的「粉紅色米田共」。活動上，三人親手製作聖誕Cupcake，Jeannie和Judy同樣做出「粉紅色米田共Cupcake」應節，之後與新鴻基地產代理有限公司租務部總經理鍾秀蓮主持剪綵儀式。
單身易傳緋聞
單身多時的Jeannie日前被發現與陳家樂撐枱腳，問到是否要恭喜她拍拖？她叫大家冷靜，並說：「其實係兩個人一齊收工去食飯啫！」問到為何載家樂返香閨？她說：「家樂冇揸車，佢又過香港，咁我屋企停車場樓下係港鐵站，咪兜埋佢轉港鐵囉！」問對方是否有意追求？她即說：「冇冇冇！」有指兩人態度親暱，家樂更出手餵食？她說：「呢啲只不過係文字上同拍攝技巧，想增強娛樂性啫，冇餵呢樣嘢！（共用一隻豉油碟？）係角度問題。」問到是否正在發展？她說：「因為一齊拍劇，加上大家都係單身，所以容易傳緋聞啫！」她盛讚家樂捱得，可以不用睡覺，那是否合她心意？她緊張得出現口誤：「咁勤力係『優處』嚟！（咩『優處』？）係…優點！（你哋好啱Key？）工作上囉，工作人員話我哋個樣似兄妹！」記者即起哄笑指通常認契兄妹就會拍拖，她嚇得大呼：「放過我喇！（了解中？）冇冇冇，真係要講清楚，唔想有咩猜測，我哋只係一齊工作啫！」但坦言沒必要避忌，日後會照樣一齊食飯。
何廣沛驚訝朱朱「年紀大」
至於Matthew被緋聞女友朱晨麗投訴，指生日只收到其短訊祝賀，他表示：「有問佢幾時食生日飯呀！（話追求佢嘅人唔夠主動？）我好主動，我有Send Message，仲一到凌晨12點就喺Instagram留言恭喜佢！（撐枱腳慶生？）點撐，等佢得閒先。（有冇送生日禮物？）請佢食一餐，送埋生日蛋糕都夠啩！」問到可擔心朱朱有其他追求者？他笑說：「咁大鑊？」記者續指朱朱已31歲，是時候拍拖，他竟大膽說：「咁大喇咩？……我意思係個樣睇唔出，咁我都29+1啦！」問他是否已有真命天女，所以沒對朱朱採取行動？他說：「唔係，只係大家都忙啫。」