一次定兩次？願驗DNA
黃子恆昨日接受記者訪問時，直認與女粉絲有性關係，但只得一次冇第二次。
記：記者 黃：黃子恆
記：你哋前後發生過兩次性行為？
黃：其實我同佢只係發生過一次，我哋第一次見面係上年4月 Fans meeting（聚會），之後就各有各散，聚會之後嘅一星期，佢話有份禮物送畀我，當日係第二次見面。
記：第二次見面，即收禮物時，喺你酒店房見面？
黃：唔係，喺佢住嗰度，一間深圳類似酒店式住宅嘅地方，其實聚會見面之前，我哋已認識，喺微博有溝通，但我覺得第一次見面喺聚會，係個好好見面嘅場合，避免兩個人單獨見面。
記：Michelle話懷有你嘅BB，進行性行為時，你哋有冇做足安全措施？
黃：有，有做足安全措施！（有冇戴避孕套？）有！其實我同佢已經有年半冇見過。
記：會唔會報案？
黃：我都有諮詢過律師意見，呢啲都係民事訴訟，始終一場相識，一場朋友，曾經我都畀咗個希望佢，嘗試過之後唔Work都冇辦法。
記：怕唔怕佢做傻事？自殺？
黃：佢諗歪我都冇辦法！呢啲我都控制唔到，我只希望謠言唔好再散布出去，其實要證明我都有辦法證明！
記：驗DNA都肯？
黃：肯！我隨時Welcome！我對天發誓，我冇同佢做過第二次，可以Check我出入境紀錄。