蕭正楠向定欣獻嘴：畀啲滋潤佢！
蕭正楠、曹永廉、胡定欣及姚子羚昨日出席無綫旅遊節目《兄弟姊妹去旅行》記者會，趁機送上蛋糕為早前生日的子羚慶祝，眾人大唱生日歌之餘，定欣還與壽星女咀嘴，阿蕭見狀即抵死說：「到我同定欣Kiss喇！」但當然慘食檸檬！對於索吻失敗，他笑說：「見佢Dry咪畀啲滋潤佢囉！其實想爆料，阿廉從小已經視姚子羚為幻想對象，所以今次一齊浸浴缸好滿足！」
曹永廉上山怕冇命
自嘲年紀大的阿廉則表示，拍攝期間行很多路，又到高山取景，為免空氣稀薄令身體不適，故出發前準備好哮喘藥，他更百無禁忌說：「無謂就咁走咗，運返嚟又麻煩，其實遺體有冇商務坐？」阿蕭即豪氣表示會自掏腰包買商務客位機票給他，但會將其飛機餐據為己有！此外，談及好友鄭嘉穎做爸爸，阿廉幽默說：「原本以為佢唔得，知佢好鍾意小朋友，今次又搵到對手，希望佢追番時間，生完一個又一個啦！」
想同「性博士」合作
至於定欣就踢爆子羚平日斯文，但內裏卻很Salty，在節目內經常帶頭講有味笑話，問她會否搭嘴？定欣說：「諗到我都會講，但冇子羚咁勁，佢講嗰時仲要戴住眼鏡喎！好在兩個男仔都有對象，唔係實『出事』。」而子羚不諱言要睇對手，被取笑與「性博士」馮盈盈有得揮，她即提議合作主持節目，相信會火花不斷！
