懷有第二胎的無綫藝員沈可欣，佗B八個多月，日前與老公楊證樺及大仔一齊影寫真留倩影，昨日將靚相上載社交網與大家開心分享，其中一張相囝囝坐上爸爸膊頭，沈可欣錫住囝囝，而楊證樺就錫住老婆的孕肚，幸福滿瀉！
沈可欣指佗第一胎時來不及影大肚相，今次補番數：「影番一輯好靚嘅大肚相！回想佗大仔嗰時，原先已約好日子影相，但係大仔早咗出世，影唔到！我好失望喺產房前喊。但有心唔怕遲，今次終於影到啦，仲要一家四口一齊影！」至於再為人父的楊證樺講到除衫影寫真，他笑言：「其實係即興嘅，我見太太影得咁開心、咁過癮，所以就即刻除咗件衫影埋一份。」