陳曼娜生日P于莉驚喜突襲
相識滿天下的藝人陳曼娜日前舉行盛大生日派對，多位好友包括羅霖、胡楓、林家棟、關寶慧、文頌嫻、周家蔚、黃淑儀及老公、鮑起靜及林小明等到賀，最令她驚喜的是久未露面的一代性感女星于莉，成為神秘嘉賓「突襲」派對！曾拍電影《刀劍笑》、劇集《絕代雙驕》等經典作品的于莉，近年已鮮有幕前演出，最近一部作品已是2014年和內地女星楊冪合演內地劇《微時代之戀》，她雖已屆55歲之齡，但保養得宜，女神魅力不減！
抱實外孫女冧晒
對於于莉突然現身，陳曼娜說：「真係好開心、好驚喜，佢特登由北京飛返嚟，我哋好耐冇見，佢係我契妹，感情一直都深厚，依家更加啱傾，因為佢同我一樣信咗基督教。」又指要多謝兩位「囡囡」文頌嫻及周家蔚，因為她們訂造設計精緻的兩層蛋糕以表心意：「以前拍劇，文頌嫻做我個女，大家一直都有聯絡，我當佢同周家蔚好似自己個女咁，好錫佢哋。」
全晚最令她感到甜絲絲，當然是女兒鄭祖兒和外孫女「棉花糖」，穿上紅裙的「棉花糖」伴着她一起唱生日歌，手舞足蹈，非常可愛！陳曼娜說：「生日願望係身體健康，因為呢輪成日咳，咳到黐肺！（幾時再拍劇？）其實都有幾年冇拍，最近ViuTV有搵我，想我同劉美君合作，依家傾緊，我心大心細！」