衛詩雅Sell慘情照食檸檬

女星衛詩雅早前應護膚品牌邀請拍廣告，並在街頭擔任一日店長，她自言一直以來都想試，覺得會好好玩，但事後才發現原來店長唔易做：「最難係Sell產品！頭先都有畀人拒絕，真係有啲唔開心！」雖然被拒絕，但她發揮演員本色﹕「我係演員類型嘅售貨員，被拒絕嘅話我會扮到好慘同扮想喊！」還即席示範如何用30秒扮慘，不停哀求顧客：「我求吓你買啦！如果你唔買，我就會畀人炒o架喇！我屋企有3隻貓、3隻狗等我養！」雙眼水汪汪帶有淚光，但最後卻被顧客認出演員身份，反過來要求合照。