麥德羅箍煲成功睇場擺酒？
下月「登六」的80年代舞王麥德羅，今年3月疑有「小三」，令相識30多年的女友陳麗萍（Apple）嗌分手，不過花了半年時間落力箍煲後，據知兩人上月秘密再復合！
「登六」擺大壽
麥德羅講過60歲就計劃求婚，日前他與女友現身尖沙咀一間酒樓，疑似商討結婚擺酒事宜！不過Apple表示只是打算為男友擺大壽。問到是否已和好如初？他們大耍花槍，全程肉麻互冧，麥德羅笑說：「佢突然間話唔捨得我喎！」Apple笑說：「咩呀！你唔係咁講，你仲話你好愛我，你係咁等我，喺我屋企樓下等幾個鐘！」桃花旺盛的麥德羅直認不少女粉絲得知他們分手後都很開心：「佢哋話Apple離開你，我哋可以代替，你畀機會我哋得o架啦！」Apple踢爆男友分手時變喊包，她說：「我前世欠咗佢，佢又喊，我又喊。佢好衰，見我唔睬佢，喊住自拍，覺得佢好可憐，好驚佢跳樓死。」
自認耍花槍醜怪
兩人再度復合，坦言會珍惜，Apple尷尬笑說：「加埋百幾歲，但似廿幾歲咁，我都覺得好醜怪！」而麥德羅承認性格熱情，見人就攬錫：「佢見到又唔鍾意，會妒忌，我哋會互相包容。」Apple續指鄧英敏曾對她說：「佢話呢個係孫悟空，你係觀音大士，要以慈悲心待佢。我都要學吓，唔會再當眾鬧佢。」問到可會提早拉埋天窗？麥德羅說：「安排緊。（大壽嗰日求婚？）賣個關子先！」
