馬德鐘度期開續集陳瀅劇透冇好結局？
藝人馬德鐘、何廣沛、張彥博及陳瀅等，昨午到馬鞍山宣傳無綫台慶劇《跳躍生命線》，場面熱鬧。該劇踏入結局篇，身為男主角的馬德鐘表示不捨：「成個劇組非常溫暖，嚟緊我會畀曾偉權追斬，有少少動作戲。（想收視衝幾點？）我比較貪心啲，35點啦。（如果真係開續集有冇期？）期係度出嚟嘅啫，一定有嘅。」
何廣沛重演F4吸Like
何廣沛談到與劇中好兄弟張彥博、羅天宇及郭子豪重演F4《流星雨》的經典MV，他開心表示：「放咗上網幾日，已經有50幾萬人睇過。（構思點嚟？）我頭兩集戴假髮演出，自己將相放喺言承旭同周渝民隔籬搞笑，於是同佢哋幾個度度吓就想做啲嘢，一齊衝上公司四樓，向負責嘅同事Sell橋，最後用咗兩個鐘就拍完，大家都想留番個回憶。如果有人搵我哋一齊唱歌演出，梗係唔介意啦。」
此外，陳瀅在台上說漏了嘴，劇透指最終沒有與羅天宇「走在一起」，不過受訪時她即封嘴補鑊：「唔想講住，大家拭目以待啦。」至於她與羅蘭的「嫲孫情」感人兼催淚，她坦言：「拍嘅時候好大壓力，加咗好多自己想同親人講嘅說話落去，因為我嫲嫲本身都有腎病，感同身受。」
