諸葛紫岐嬲豬搵「新歡」老公變阿二！

諸葛紫岐嫌老公薛嘉麟冇新鮮感，嚇得對方急耍冧補鑊。

諸葛紫岐與老公結婚多年依然恩愛，昨日結伴出席沙田馬場舉行的「莎莎婦女銀袋日」活動時，Marie卻投訴老公冇新鮮感，又詐型指對方公務繁忙冇時間相陪，薛嘉麟即耍冧表示會同太太環遊世界旅行補償，但被Marie大爆經常開空頭支票：「成日講完唔會做，講咗好多年，結婚講到依家。」並指老公在其心目中並非排第一位：「我鍾意個仔多啲，老公已經係第二，遲啲可能第三、四。」薛嘉麟聞言即說：「我會進修吓，同保持新鮮感。」又表示會安排聖誕節與家人出國旅行。

李丞責準備做馬主

以「形象大使」身份亮相的李佳芯本月27日36歲生日，問到贏視后是否生日願望之一？她說：「有當然開心，但唔係生日願望，拎唔拎獎唔係最重要。（同男友陳炳銓點慶生？）都係食餐飯，我哋平時都會送小禮物畀對方。（想結婚？）再傳吓先！傳過好多版本，話我生過仔都有。（唔急？）唔急，後生時會想生B，依家覺得隨緣，到結婚有就有，唔會強求。（未婚生仔？）都可以，但冇咁諗。」同場的李丞責則透露快將成為新馬主，愛駒由老婆劉倩婷起名為「歡樂從心」，待下周測試過關後便可出賽。

胡定欣與一眾模特兒行騷。	李丞責與太太中了兩場三重彩，認真夠旺！	利蘊珍（中）與老公雷禮權及女兒盛裝出活動。

利蘊珍為母親闢謠

而同場的利蘊珍對於前晚突傳其93歲母親、前電視廣播有限公司非執行董事利孝和夫人利陸雁群身體不適，她澄清：「唔好亂講，媽咪好好，冇事呀。」昨晚更上載在母親家中進餐的相片。