「傻大姐」張文慈減壓當自己新人
藝人張文慈（Pinky）於無綫台慶劇內破格扮演十三點，被網民大讚可愛。3年前加盟無綫後，她當正自己「新人」去學習，感恩每次拍劇都遇到不同角色，可作新嘗試之餘，更能自我挑戰。
Pinky在台慶劇《跳躍生命線》中的角色與以往冷艷形象大相逕庭，劇中的「Mean爆傻大姐」形象本來令她有點擔心，「太港女」演出會令觀眾反感，想不到最終反過來被網民大讚可愛，她笑言用「意想不到」來形容最貼切不過。Pinky不忘多謝監製方駿釗給予機會，且感恩遇上相當有愛的劇組。
劇中這個姑媽間中會搵姪女笨兼且粗心大意，但現實生活中剛再次榮升姑媽的Pinky卻細心非常：「我自問對屋企好認真同負責任，好記得有場戲講我畀錯嘢個姪女食，坦白講起初睇劇本時我真係接受唔到，現實生活中我係唔會畀呢件事發生嘅！」不過角色與現實卻真有類同之處，Pinky靦腆說：「例如劇中不斷講我話要減肥，同埋有時啲小動作同口脗，我屋企個工人姐姐睇完就發出會心微笑，話真係好似平日嘅我。」
多人錫好開心
加盟無綫3年，Pinky先後接演6部電視劇，遇到的角色次次不同，令她大感新鮮，而她亦沒有以「前輩」自居：「我同自己講，簽約無綫拍劇就要當正自己係新人，咁先冇咁大壓力。可能自己成長咗，或者受信仰影響，依家我好清楚自己究竟想要啲咩，難得嘅係公司上下遇到好多人好錫我，我覺得依家只要有健康、家人齊齊整整就好滿足。」
化妝：Lu
髮型：Ethan Ng by Hair
場地：Amaroni's