歐陽巧瑩笑唔出「師」冧功氹番
「咪神」歐陽巧瑩將與拍拖四年的「木偶哥」林師傑結婚，日前抽空拍攝婚紗照，穿爆乳婚紗盡騷34C！由於拍攝時間太長，師傑見老婆笑到木無表情即出盡法寶，氹得她感動非常，揚言冇嫁錯人。
歐陽巧瑩（Tammy）與林師傑拍拖四年終修成正果，將於本月23日結婚，早前女方公布星級兄弟姊妹團，更以「禽獸」形容一班姊妹，不捨老公於結婚當日被蹂躪，錫老公錫到出晒面！近日，一對準新人忙於為婚禮作最後衝刺，抽空拍攝婚紗照，Tammy妹妹還充當化妝師，為家姐打造靚靚新娘妝。
換衫遭「陌生人」闖入
兩人先後換上多個造型，當中不乏甜蜜照，期間師傑細心為太太整理頭髮，Tammy亦全程小鳥依人。擁有驕人上圍的她當然趁機騷Quali，換上一襲白色Deep V婚紗，盡騷其34C導彈，還緊緊從後攬住老公，肉緊啜爆對方面珠，但面對一整日無間斷拍攝，即使對慣鏡頭的她也笑到僵硬，受訪時說：「我真係笑都笑唔出！後期表情欠奉，師傑見到我咁即刻係咁氹我，佢真係好好！（冇揀錯人啦！）係啊！都幾冧o架！」
穿上婚紗一刻，Tammy表示終感到婚期將至，又指拍攝當日發生小插曲：「我入去換衫嗰陣，劉佩玥戴住口罩衝入嚟換衫室，嗰刻我認唔到係佢，真係嚇親我，以為係咩人嚟！原來佢幫阿感婚禮做姊妹，嗰日咁啱佢去嗰度試裙，真係又驚又喜。」
