吳嘉熙29+1捱夜玩長征
歌手吳嘉熙性格樂天，原來亦曾飽受驚恐和迷失，令她變得鬱鬱不歡，年底就告別二字頭歲數，為怕人生留下遺憾，她決定接受考驗，希望做出令自己覺得驕傲的事！
組合Super Girls（SG）成員吳嘉熙（Cheronna）繼渡海泳後，將於年底再挑戰毅行者，今年踏入三字頭的她坦言不想人生有遺憾：「我年尾就29+1，趁叫做後生快啲做，驚老咗做唔到，我覺得呢兩項都係考毅力，希望挑戰到自己。」男友黃奕晨兩項活動都陪她報名參加，她笑說：「係我逼佢，但佢肯願意陪我去做。」
跑步練氣準備
毅行者要四人一組，除了她及奕晨，還有張惠雅及On仔@ＣAllStar，Cheronna說：「講求團體性，因為100K要喺48小時內完成係唔容易，要上山落山又斜路，仲要捱眼瞓冇得紮營，寧願快快完成，我哋目標係捱一晚夜，希望喺36小時內完成，大家要校啱一個步伐，互相鼓勵。」他們現時做足準備，一有時間就行山、跑步練氣：「盡量早啲瞓，試過唔夠瞓去行係唔舒服。」
冒汗心跳加速
講到第二首單飛新歌《你的你》充滿正能量，看似開心果的她，曾自覺被標籤肥和唔靚，令她陷入長達三年的迷失，當時情緒好波動：「喺屋企都會突然出晒汗、心跳加速，吹緊頭髮會突然好驚，要周圍行冷靜吓。」她曾懷疑是否要改變自己去迎合大家，但這樣做違背宗旨，令自己不開心：「首歌係鼓勵大家，你唔係一個人嘅，好多人都面對呢個情況，希望唔好咁執着呢啲，做一個開心嘅自己。」
