鄧萃雯引郎入室勾林德信上床
現年52歲的藝人鄧萃雯，在ViuTV新劇分別與陳錦鴻及相差19年的林德信有感情線，當中與林德信更有床上戲份！昨日她談起時笑騎騎，相反林德信則一臉尷尬！
鄧萃雯、陳錦鴻、林德信及廖碧兒等昨日出席ViuTV新劇《婚內情》拜神儀式，首度合作便演夫妻的雯女與錦鴻，甫見面即雞啄唔斷，但雯女率先「投訴」，指本以為與錦鴻會有連場愛情戲，怎料劇中二人是老夫老妻，沒有過激親熱戲，更爆錦鴻多妹妹仔埋身！
分享夫妻房事
錦鴻聞言即來個大反擊，指「情敵」林德信在二人床上大覺瞓，暗示雯女與這位年輕19歲的「鮮肉」有親熱戲！他更即席「審問」雯女：「係咪同林德信瞓埋同一張床？有冇身體接觸？」雯女承認之餘還開懷大笑，之後錦鴻更將林德信拉到鏡頭前，場面搞笑！林德信被問到親熱戲即一臉尷尬，他說：「劇入面我飾演佢醫生，好鍾意雯女，據我所知的確會有喺床上拍嘅戲。」
錦鴻又透露拍攝期間，有跟雯女解釋老夫老妻的日常生活：「雯女問我哋平時瞓覺前係點？要唔要傾吓偈攬吓，或者錫一啖先瞓？我話結咗婚十幾廿年，呢啲嘢唔使o架！通常男人做錯事，先會主動同老婆講『你攰唔攰？幫你按摩。』不過呢啲都係我以前聽Uncle講而跟住做咋！」
廖碧兒愛上姐夫
至於碧兒則透露與劇中家姐雯女同時愛上錦鴻，日前更與錦鴻拍了3日親熱戲，問到拍攝時可感尷尬？她說：「冇，排晒先。識咗佢十幾年，記得喺無綫拍《妙手仁心III》時第一次拍情緒起伏戲，錦鴻喺隔籬廠過嚟幫我，佢一直當我妹妹咁。」至於劇中的感情經歷會否令她恐懼婚姻？她說：「又唔會，但拍完令我更加Make Sure唔好畀錯Signal人，好易惹人誤會嘛！」