惠英紅恨嫁凸腩臭狐都OK!
影后惠英紅近日受勳，經理人公司英皇娛樂老闆楊受成前晚特意於銅鑼灣為她設宴慶祝，公司一眾高層包括霍汶希等亦有現身。惠英紅受訪時坦言：「嚟到呢一步，我嘅人生算係咁啦。（下一步想做乜？）結婚囉！」
被嫌太強勢
現年58歲的她，自爆1997年後一直欠缺感情生活：「朋友都有介紹嘅，但個個都話我強。我本來係隻波斯貓，但生到似獅子咁都冇辦法。（遇到錯過咗嘅感情？）二十年前同個男仔拍拖一星期，佢身邊朋友同佢講：『你女友好索喎。』原來睇過我寫真。男仔個心唔舒服，講咗啲難聽說話，係我飛佢嘅。」
她又指30多歲時曾於旺角睇相：「嗰個相士當時好紅，細批都收5萬(o架)。佢話我要等到60幾先遇到真命天子，但對方會對我好好，我嘅生活好逍遙。當時聽完，去咗附近公園爆喊，仲要等咁耐喎。（咁佢批啲嘢中唔中？）都準，好彩仲有幾年咋。」
楊生做媒人
記者笑指她眼角高，問到擇偶條件，她即澄清：「唔使有錢，好人就得，大肚腩、有臭狐又點？或者你聞係臭，我覺得香呢？只係遇到嘅對象都話我強，一嚟就判我死罪冇辦法。（叫楊生介紹？）佢有提過吓，如果得嘅，我跪地斟媒人茶。」
