李佳芯「精神病」催淚

李佳芯形容自己靠「精神病狀態」唧眼淚。

Ali因在一次活動上晒歌喉唱出《小幸運》，歌藝「一聽難忘」，成為網民熱話，但仍獲不少人「欣賞」邀請她商演。日前她為「莎莎婦女銀袋日」任活動大使接受訪問，對獲得不少唱歌機會，直認有不間斷去學唱歌：「初初唱得唔好唔緊要，最緊要之後有進步有人讚，唱歌老師都讚我聲底好好喎，可能只係未識用氣。（爭取唱主題曲？）之前睇《BB來了》嘅觀眾都有問點解唔唱埋，咁有屬於自己劇，仲唱埋主題曲會完整啲，但隨緣啦！」

唔會主動爭取

她坦言比較少主動爭取，是隨遇而安的人，問到不怕蝕底？她說：「係呀，所以我咪遲起步，好遲先入行。（依家做到成績可以進取多啲？）我唔識用語言去表達，但我鍾意演戲，可以透過角色去溝通，多過用語言。」對於被視為今屆視后大熱？Ali說：「有得攞梗係好，但攞到又唔會令我冇咗目標，因為我嘅目標唔係為攞獎。」在《B》劇中她演技大爆發，經常要爆喊，她說：「我唔係好易喊嘅人，我都諗點唧到眼淚出嚟，每個人喊點唔同，我會不斷同自己講好慘好慘，呢種我自己形容為『精神病狀態』嘅方法囉！」

李佳芯為了歌藝更精進，畀心機去學唱歌。

Ali在《BB來了》中爆喊，演技被大讚。

學策騎草原馳騁

除了為工作學唱歌，愛良駒的她更學策騎：「曾經學咗年半，依家去旅行都會揀一啲地方有得策騎嘅。（諗過做馬主？）有㗎，我夢想喺屋企有個後花園，可以畀佢自由咁走。（拍古裝有優勢喎！）當然冇問題啦，但我好少拍古裝，未有咁機會，我都等緊喺大草原馳騁嗰一刻。」