任達華拖導盲犬周街吹水
影帝任達華一向是好好先生，昨日他在上環為新片開工，拍戲之餘到處與街坊聯絡感情，成功與外籍老師打交道，又與眼鏡店老闆「稱兄道弟」。戲內飾演盲人的他氹導盲犬亦有一手，短短時間已成功建立感情。
任達華、羅仲謙昨午現身上環，拍攝星皓電影講述導盲犬的新片《小Q》。昨日戲份比較輕鬆，只見戴上假髮扮盲人的任達華拖着導盲犬逛街，期間與謙仔相遇。雖然近日氣溫下降，不過穿上一身冬天戲服的任達華依然熱到冒汗，期間又不忘四出「聯誼」。
多街坊老友
由於拍攝現場附近有學生返學，要求劇組作出配合，期間任達華與外籍老師吹水閒話家常，隨後又向附近眼鏡店借太陽眼鏡拍照自娛，當要更換戲服時，他指着眼鏡店說：「去我老友度借地方換件衫先！」
摸頭冧狗狗
據悉，今次題材因涉及導盲犬，兩位男主角事前都抽空接受與犬隻相處的訓練，昨日所見，任達華與導盲犬同場似乎已相當習慣，除不時俯身安撫牠，又低聲向牠發出指令，臨離開時又摸摸導盲犬的頭笑說：「要離開你添，乖呀吓，我哋好快會再見！」當正牠是小朋友一樣，相當搞笑！
至於「回歸」拍港產片的謙仔，昨日等多過做，不過其身形卻明顯「升Cup」兼現麒麟臂，他公開放閃說：「老婆鍾意我『厚身』啲嘛，同埋依家轉咗去屋企附近健身，所以認真啲去操囉！」