劉佩玥被擺上枱接力晒「三點」
藝人陳瀅昨晚出席劇集祝捷晚宴，踢爆同劇的幾位後生仔演員拍「露三點」短片賀收視，連累劉佩玥、張曦雯等女拍檔被擺上枱，被要求穿泳裝谷收視。
無綫台慶劇《跳躍生命線》播出以來收視不俗，昨晚於電視城舉行祝捷晚宴，公布七日跨平台總收視為29.8點，第十集（19日）更達30.8點！一眾主演陳瀅、劉佩玥（Moon）、馬德鐘、何廣沛與張曦雯等現身，連高層杜之克及曾勵珍亦撐場，期間一班年輕演員做35次掌上壓，寄望收視衝上35點。
陳瀅撩鼻屎：係真性情
對於作品收視佳，陳瀅被問到如何慶祝？她卻爆料：「觀眾鍾意睇男士多啲，聽聞郭子豪、何廣沛同張彥博為慶祝30點，去咗沙灘拍一段片好似係露三點！（你呢？）諗住叫演員一齊捐血，呢四年嚟我每年都最少捐兩次。」她表示劇中有「男人婆」一面，如粗魯及撩鼻屎：「以前畀人叫女神，其實我都可以有其他路線！撩鼻屎係自己加入去，竟然冇剪走，都叫係我部分真性情。」對於被爆露全相，何廣沛即解釋：「我、郭子豪同張彥博去咗沙灘淋水濕身拍片，郭子豪話要露三點，點知係欺騙觀眾，只係兩點加肚臍！」Moon聞言即指對方賴皮，卻反被對方擺上枱，指收視達35點便交由她搞搞新意思，Moon即時笠水：「好驚唔敢講，佢（何廣沛）可以露三點。（你着三點式？）選完港姐到依家都冇着三點式，依家你哋畀群眾壓力我，我個人好傳統，着呢啲好怕尷尬。（緋聞男友周志文唔畀？）唔係啦！」
馬德鐘恨攞最佳劇集
對於提議一班同劇女星穿泳裝慶祝，馬德鐘笑言絕對有睇頭：「一定要，其實張文慈都好弗！雖然劇入面做我家姐，但畫面都應該好養眼，所以佢哋四個喺結局前一齊再谷收視。（有冇寄望台慶攞獎？）冇太大，但都想齊齊整整攞『最佳劇集』。（開續集？）如果公司有呢個需求，會全力以赴。」