司徒頌曦爭氣改變荷里活文化
以亞洲人孭飛的電影《我的超豪男友》（Crazy Rich Asians）於暑假票房大賣，外界對亞洲電影人再度關注。最近一位香港男演員成功打入荷里活，成為影壇新星，他就是來自藝術世家的司徒頌曦（Hayden）！
現年33歲的Hayden於加拿大長大，2016年憑校園喜劇《17歲的邊緣》（The Edge of Seventeen）走紅，月前更參演話題電影《死神遊戲：Truth or Dare》，炒熱人氣。日前他回港探家人時接受本報專訪，大談勇闖荷里活的血汗史：「我長大後決定要喺美國做演員，其實嗰陣準備執行李搬去洛杉磯時好驚，因為嗰邊冇幾多機會畀亞洲演員，尤其係亞洲男性，因為以往荷里活片以外國人為主，亞洲女性通常都被安排演女友、奴隸，屬配襯角色。而亞洲男人仲衰，完全唔當係人，被當正係狗！成日演被人取笑嘅角色。」
推薦提名奧斯卡
Hayden表示初時見到這個情況很嬲：「但我同自己講嬲係冇用，要自己出去闖先可以改變，要同其他人背道而馳，如果唔係咩都改變唔到，當年李小龍就係咁。我知道返亞洲可以搵到食，但對我嚟講咁樣冇乜意思。我覺得亞洲人喺荷里活爭一樣嘢，就係冇人敢去追呢個夢想。我哋需要更多『軍隊』過荷里活嗰邊，唔可以孤軍作戰！」自從亞洲人擔演的《我的超豪男友》於今個暑假出現後，情況立即轉好。近期Hayden主演的新片《Tigertail》台前幕後都由亞洲人擔任，他說：「依家喺美國做亞洲演員係最好嘅時候，我能夠置身其中，真係好幸福。」
在荷里活打滾6年終捱出頭，Hayden憑一部低成本的校園片走紅，就連電影公司都在電影雜誌落全版廣告，推薦他提名奧斯卡最佳男配角。他坦言當時見到廣告時感動到喊足半粒鐘：「你必須要明白當時我嘅經歷，我當時追呢個夢想追咗6年，每年續美國簽證都要畀新成績移民局睇，例如拍咗幾多個廣告、拍咗幾多部戲。之前3年完全冇做出咩成績，心諗係咪要返加拿大？差唔多疊埋心水返屋企時，經理人打電話畀我叫我去霍士（Fox）試鏡，經過兩次試鏡後終於成功，結果有電影網站報道呢件事，就係咁我獲批綠卡，拍戲拍到今時今日。」他很開心在片中的戲份好重，更擔任白人女主角的男友，能夠接演重要角色，他表示一定會努力演出！
周星馳影響深遠
雖然Hayden是「竹升仔」，但原來自小睇港產片長大。在芸芸港星中，他最喜歡周星馳、梁朝偉及黃秋生，他說：「周星馳好似以前羅賓威廉斯（Robin Williams）咁，雖然好多人認識佢都係喜劇，但拍劇情片佢都一樣得。」更自爆於《17歲》的演出深受對方影響。又指《古惑仔》系列對他影響很大：「嗰時細個，雖然父母係香港人，但自己喺加拿大土生土長，好似冇咗香港人嘅身份。睇《古》片時先知香港係咁樣，例如片中提到嘅地方藍田、銅鑼灣，雖然聽過但未去過，喺戲入面見到，覺得好特別，睇嘅時候有種『我都係香港人』嘅歸屬感，所以好鍾意。」Hayden笑言當時不少加拿大的年輕人都學鄭伊健留長頭髮，他覺得戲入面最有型的角色是「陳浩南」，無論是鄭伊健或謝霆鋒扮演都非常有型。又稱若劇本適合，有興趣拍港產片。
學詠春保護自己
與好多年輕人一樣，Hayden亦有學詠春，不過他不是因為李小龍或電影《葉問》而學，他說：「我好細個學過詠春，依家就愛打西洋拳。記得細個返香港同表弟出街，唔小心撞親人，當時個男仔兇神惡煞拉我埋角落，我當時好驚，就喺嗰陣我決心學詠春同泰拳保護自己。最近我有機會喺電影《Come As You Are》用到西洋拳，因為我個角色係打拳。」除了學拳傍身之外，Hayden亦透露早前他為另一套戲《Summer Night》學彈三個月結他。
出身藝術世家
Hayden生於藝術世家，父親是中國著名畫家司徒乃鍾。生於廣東開平的司徒乃鍾在世界各地均舉行過畫展，並曾任香港藝術館顧問、廣東省美術家協會副主席以及中國美術家協會會員。Hayden的祖父亦屬猛人，是中國著名嶺南派畫家司徒奇，至於曾祖父則是中國著名詩人司徒枚。
雖然Hayden沒有選擇畫畫作為終身職業，但年幼時獲父親教畫畫，不過他自嘲坐唔定而放棄，又指父親經常帶他睇戲，漸漸愛上電影：「記得當時父親帶我去睇湯告魯斯（Tom Cruise）套《壯志凌雲》（Top Gun），當時我覺得演員好似幾好玩，可以演唔同角色，於是我就立志做演員。」