反白眼上位！莊思敏「衰」開有財路返內地掘金

莊思敏肯搏肯捱，又唔介意晒身材，當然大把工作。

現年38歲的莊思敏（Jacquelin），過往參演不少電影及劇集，經常飾演乞人憎角色，尤其在《溏心風暴3》自創反白眼鬧人，獲網民封「反白眼女神」，堪稱代表作。由於夠Mean又有Noise，近日她已簽約北京電影公司「耳東繁星」，致力開拓內地市場，明年一月落實拍電影，飾演古天樂老婆。

學調酒雞手鴨腳

兩年前她離開蕭定一的公司，回復自由身即化身工作狂，投資多項飲食生意，包括酒吧、餐廳和點心店，近日又經營網店賣護膚品，生意總投資逾百萬元。早前她與助手現身銅鑼灣有份投資的酒吧，期間酒吧經理示範調校最新的Cocktail時，她即拿着杯模仿，邊看邊學，但過程論論盡盡，不時傳出笑聲。之後她與助手對店內的遊戲機甚感興趣，玩了機一輪後，用手機拍下照片便離開。

被新朋友鬧爆

對於簽約北京公司向內地發展，Jacquelin說：「係，一路想喺香港以外地方發展，我同香港好多電影老闆都熟，係好朋友，所以想試吓去遠啲嘅公司發展。（酬勞理想？）機會最緊要，錢係其次，自己喺內地係新人，如果講錢，我出個Po好過，出一個Po都幾萬。（同古天樂拍新片又做衰人？）我最鍾意做衰人，反白眼唔係個個得o架！（驚唔驚出街畀人鬧？）大把人鬧，有次有個新相識嘅朋友，兜口兜面話我好衰！其實我真人係一個好人，好仁慈，唔會白鴿眼，哈哈。」問到以後是否較少時間打理香港的飲食生意？她說：「平時都係幫手宣傳，帶啲朋友嚟玩，我少喺香港，一返嚟啲朋友更加會出嚟啦。」

酒吧內有遊戲機，莊思敏玩得勁興奮。	莊思敏學調酒時一臉認真。	古天樂與莊思敏於新片飾演夫妻。