任達華「撲火」寄電磁爐畀琦琦
影帝任達華、黎燕珊、朱慧敏及羅霖等前晚出席美容周年慶典捧鄭明明場，留了一面白鬚的任達華指外在美全靠太太琦琦幫手：「原來留鬚敷Mask係唔貼塊面，敷唔到，其實家庭開心就自然靚。」早前琦琦自爆在英國下廚險發生火警，他即說：「佢唔好再煮嘢食喇！我畀佢嚇咗一跳，因為咁樣，我特登買咗3個電磁爐寄去嗰邊，煮咩都得，唔使用火。」
而黎燕珊透露入行不久已獲鄭明明免費教美容：「我有讀過（美容課程），有證書o架！我識電眼睫毛、紋眼線，明明姐仲話做演員呢行都要鋪定出路，我最初都有諗過放棄拍戲去做美容。」鄭明明大讚黎燕珊在美容方面有天分。朱慧敏則表示將有新計劃，打算向美容界發展，將報讀美容課程。而羅霖穿上大露背、真空裙，十分性感，透露剛從沖繩回港，早前當地打大風，住所引了不少蟲及蜘蛛：「晚晚瞓唔到，喺度捉蜘蛛，試過一晚捉到兩隻。」
