爆遭白眼累師姐被誤會 佘詩曼還清白：一定唔係雯女！
藝人佘詩曼最近在內地受訪時自爆曾遭白眼，昨晚她出席活動時澄清並非鄧萃雯，而且跟當事人之後有再合作，已冰釋前嫌有講有笑。
佘詩曼、周家蔚及林奕匡太太李靄璣昨晚到中環置地廣場出席品牌Balmain Paris新店開幕活動，阿佘穿貼身透視晚裝，若隱若現。最近她受訪時大爆當年在頒獎禮遭同行白眼，外間矛頭直指曾跟她爭視后的鄧萃雯，阿佘為此作出澄清：「一定唔係雯女，佢係好好嘅前輩，而且係我同一學校嘅師姐，大家唔好誤會，個訪問係清談節目，主持人問到呢個題目，我唔係想傷害人，但如果乜都答冇，個節目好冇趣，都咁多年前，當時大家唔懂事又後生，之後都有見番，大家有講有笑。（之後都有合作？）有！Keep到好好關係，人總要有多啲經歷先成長。」問到現在紅透半邊天應該不會再遭受白眼？阿佘笑說：「開心囉！其實你想人點對你，自己就要點對人，要善待任何人。（如果人哋再白眼你呢？）我會整番佢笑。」
周家蔚瞞住老公玩性感
講到憑熱爆劇《延禧攻略》提名華鼎獎最佳女配角，阿佘直言是意料之外，最開心是大家喜歡其奸角，但之後作品希望再有新嘗試。
其好友周家蔚身穿低胸裝到場，笑言老公洪天明也不知她如此性感，但相信對方不會介意：「我都唔慣，開頭知道要着呢件衫都唔知咁Deep V，所以搵人幫我縫高三吋。」對於阿佘提名華鼎獎最佳女配角，家蔚表示會為她打氣，並讚不絕口：「佢EQ同IQ都爆燈，我哋姊妹間有咩問題都會請教佢，佢係高人，佢會幫我哋解決感情問題。（佢感情問題呢？）我就畀唔到意見佢，但係佢好清楚自己需要啲咩，有自己目標，好開心活在當下。」