匿地底搞機密嘢霆鋒自嘲人工低

藝人謝霆鋒昨日出席活動,自嘲人工不高的他無懼內地「限酬令」,談到有指王菲要回水9,000萬元,他即維護女友叫咪亂講!

「型男廚神」謝霆鋒與連鎖快餐店合作推出香港風味的漢堡包,昨日到尖沙咀出席發布會,並即場下廚顯身手。受訪時提到內地「限酬令」,藝人總片酬不得超過1,000萬人民幣,問到可有影響?他說:「政府有乜都會跟住做。」問到可用回水?他擰頭說:「我邊度高呀?」但講到有指女友王菲酬勞達1億元,要回水9,000萬元,他即笑笑口說:「唔好亂講。(對佢有冇影響? )呢啲唔答啦!」

霆鋒表示今次花了很多心機設計兩款漢堡包,全部都是香港味道:「試咗好多次,好多嘢想做,有啲可能太黐線,但慢慢推到極限。(點黐線法?例如乾炒牛河?)都係o架!所有香港嘅嘢,總之希望有突破。」問到可有給身邊人試食?他說:「冇呀!好機密,係中央廚房,喺地底。(有冇畀兩個仔食?)遲啲先啦!」又笑言為創作食了很多包,是人生中一日內食得最多包。對於快餐店食物被指為垃圾食物,他即護航:「我哋用嘅材料同醬都昇華咗,係行高端路線!」

唔玩集體回憶

談及樂迷期待他開騷已久,問霆鋒究竟何時開騷?他說:「搶緊期,瘋狂到香港好似淨係得演唱會睇咁,搶期搶到出年底或者2020年頭先有期!」他亦考慮過中環海濱的場地,但又怕落雨。講到好友陳奕迅亦在那裏開慈善騷,他自言有諗過開慈善騷,但要視乎場地及氣氛,亦對企位有要求。問到他個人是否已準備了開騷,只是欠缺場地?他說:「要睇埋製作,希望唔係開一個集體回憶嘅騷,係要有重新經歷嘅騷。」