薛家燕爆料拒絕過黃錦燊！

藝人黃錦燊與薛家燕「再續前緣」，前晚齊齊現身無綫節目《流行經典50年》，她笑說：「當年我哋喺《真情》做『好姨』同『貓屎』，好Hit(0架)！可以話係經典情侶，仲一齊出過唱片！」她又爆當年曾「拒絕」對方：「佢去港大讀法律，因為港大好近我屋企，佢問我借個車位畀佢泊車，我就話唔得，當時都冇同佢解釋。因為佢每朝八點返學，泊完每朝都喺我屋企行出嚟，真係水洗都唔清！」黃錦燊笑言多謝薛家燕帶挈，令他再做樂壇「新人」，轉做大律師二十年後再復出，又透露正籌備劇本，為電影、劇集做監製：「依家做娛樂圈，暫時自己除咗牌先，到時先再掛番牌。」