王卓淇巴黎鐵塔野餐呃Like
前港姐王卓淇（Erin）向來喜歡周遊列國，早前與朋友飛到歐洲，她自爆為在巴黎鐵塔下拍美照，千辛萬苦帶埋道具野餐籃去旅行，雖然中途曾想拋下野餐籃，但最終堅持下去，拍下美照成功呃Like。
Erin趁空檔與閨蜜飛到荷蘭、德國及法國旅行，足足花了兩個星期遊覽三個國家，她坦言去了不少網紅打卡的地點拍照留念，並帶了十多套「戰衣」，可惜唔夠着：「最終都要喺當地買，手袋同鞋都有買，差啲行李都超重。」
差啲衰收尾
為了影靚相，Erin在內地大型網店買了一個野餐籃，並由香港帶到巴黎，雖然長途跋涉，但能在巴黎鐵塔下影靚相，她表示一切都覺得值得：「個野餐籃我由香港運去荷蘭，再去到德國，之後再去到巴黎，每次一轉地方執行李，我都萌起放棄佢嘅念頭，但諗落為咗影靚相，最終堅持落去。最好笑係去到德國時，我差啲漏咗野餐籃喺酒店大堂，搞到畀個朋友鬧我，咁辛苦帶來帶去，唔係咁樣嚟衰收尾！」
食得唔好嘥
結果，Erin成功帶同野餐籃在巴黎鐵塔下拍照，更為了拍攝效果而買了多樣食物，可惜食唔晒！絕不浪費的她，施展大愛精神，她說：「因為真係有啲食物拆都未拆，所以我哋見到附近有兩個外國人，問佢要唔要，咁佢哋又OK，結果我哋將野餐墊同籃畀埋佢，佢哋都好開心。」
撞啱啤酒節Good Luck
Erin在德國時有幸參加德國啤酒節，但她表示事前沒計劃參加：「我哋喺德國搵咗個包車兼導遊，佢話真係太好運遇到啤酒節，氣氛真係好好，有成過千人，不過玩玩吓突然落大雨，搞到個司機都話因為我哋嚟，搞到天都『突然黑』（用普通話讀，同慕尼黑讀音相近）」
閨蜜變伴旅
雖然這個旅程喪影喪食喪買嘢，但Erin此行感觸良多，她說：「呢個閨蜜係我由細玩到大嘅朋友，因為佢老公唔得閒同佢去旅行，所以佢叫我，咁啱我拍完劇又有時間，真係玩得好開心，好想再去多次。」