雨僑羅力威捱餓吵大鑊

藝人雨僑今年3月跟拍拖7年的歌手羅力威拉埋天窗，她受訪時直言婚後更開心，在一些細微處發掘到雙方優點。講到若有摩擦，他倆亦有一套解決方法：「好多人相處都係『以痛制痛』，即係如果你再咁咁，我就咁咁，但我哋覺得唔Work，唔應該互相威脅，我哋會直接講點會開心啲，好多時人係即刻發脾氣，或叫對方戒做乜乜，但咁樣盞令自己唔開心，我哋會坦白講，都好理性，比較少出現問題。」

老公幫執漏

不過，兩人亦有吵架時候，原因竟然是：「咁多年只係嗌過四、五次交，都因為我哋唔可以肚餓！記得大半年前我哋上律師樓搞文件，又要趕試姊妹裙，又漏低咗嘢，我哋都好肚餓，於是沖昏晒頭腦，就好忟憎拗究竟做咩先，不過間中有少少鬧交都係情趣嘅。」

雨僑又大讚老公是細心暖男，經常幫她執漏：「我旅行有無數次漏電話、耳塞、手袋，佢救番好多次，之前婚前輔導做測驗，先知道佢嚴謹方面係超高分。」問到生小朋友的計劃，她指最需要準備的並非金錢：「我覺得要先做到身教，自己要做好榜樣，呢樣係做父母要學習嘅事。」

網紅收入勁

曾唱歌和拍戲的她，另一最為人熟悉的身份是YouTuber，在現今網紅活躍的時代，她當然有大量KOL工作，直言佔收入的95%，雖然收入甚豐，但仍然選擇繼續做藝人：「做藝人令我可以有唔同閱歷，例如去南非拍節目、美國登台，見識多啲，寫嘢都豐富啲。」

髮型：Adam Hui＠W Salon By Il Colpo

化妝：Lisa C.＠Lisa C. Makeup Art

服裝：Etoffe　場地：Prince Hotel