連踩30粒鐘陳家樂倒地受傷

陳家樂拍攝時，現場出動疑似催淚彈，氣氛逼真。

由劉青雲、林峯、蔡卓妍及陳家樂主演的《神探大戰》日前連續幾晚封廟街拍攝大場面，先後有天台游繩、街頭警匪槍戰，吸引市民及遊客圍觀，劇組為保持拍攝進度，不停催促市民離開。

其中一晚在廟街封了整個十字路口進行拍攝，飾演警員的陳家樂及湯怡等與飾演匪徒的胡子彤、何佩瑜、張文傑、馬志威及朱鑑然等當街駁火，導演韋家輝對這場戲相當重視，Set機及度位都花了兩個小時，眾演員等候及拍攝企足六小時。

煙霧瀰漫超逼真

正式埋位，「匪徒」由廟街衝出，遇上「警察」即展開駁火，多名扮演途人的臨記爭相走避，現場更出動疑似催淚彈，煙霧瀰漫，最後家樂等多名「警員」中槍倒地，拍攝兩Take搞掂。至於另一晚拍攝馬志威、朱鑑然及張文傑由唐樓天台游繩至車頂，再與「警員」槍戰戲份，每拍完一個Shot，圍觀市民即報以掌聲。三位新生代演員表現出色，特技人、動作指導出身的張文傑現時加盟古天樂旗下，身手敏捷令人眼前一亮，除下外套時更露出結實麒麟臂！

事後家樂受訪表示近日同時拍《神》片及劇集：「捱咗一轉30幾個鐘冇瞓，多得拍劇受咗訓練，呢幾日槍戰戲雖然辛苦，但見到香港街景，好有特色。（倒地戲驚唔驚污糟？）劇情需要，我仲擦傷咗手腳，最驚係感染。」

放大圖片	何佩瑜等埋位時與劇組人員寒暄。	馬志威（左起）、朱鑑然及張文傑令人眼前一亮。