祖兒:阿詩唔係仇人師兄大話西遊

歌手容祖兒為撐黃耀明在日本開騷,與斷交多時的何韻詩於後台「破冰世紀合照」,惹網民熱議。男友劉浩龍(師兄)為陪祖兒亦有到當地,只是不願亮相。前晚祖兒大方回應與阿詩從來是好友而非仇人,而昨日師兄回應同遊東京一事時,卻「大話」西遊,前言不對後語!

祖兒、古巨基、李克勤、張敬軒、洪卓立、吳浩康、泳兒、鍾舒漫和許靖韻前晚到澳門金光綜藝館演出,基仔打頭陣,而祖兒就請來樂隊Dear Jane演唱新歌。剛從東京看完黃耀明演唱會返港的祖兒,談到跟斷交多時的何韻詩「世紀合照」,是否已重修舊好?祖兒說:「其實從來冇唔好,我諗關係上冇太大問題嘅,成件事我覺得冇乜嘢啫,緣分囉!影咗張相大家開心,但我覺得觀眾好唔冷靜,搞到件事娛樂度好高咁。」

「見到乜咪乜囉」

對兩派Fans反應激動,祖兒說:「張相實在太多關係喺度,觀眾有觀眾嘅聯想,但其實最開心係我、千嬅同阿詩,大概十年前,我哋曾經一齊喺頒獎禮裏面等攞獎。」有指照片是師兄操刀拍攝?她澄清是工作人員所拍,但對師兄同行之說,她詐傻反問:「係咪呀?好似係喎,其實大家睇到啲新聞有自己聯想,我講大家未必信,我唔講大家自己猜想、拼湊,我覺得唔需要解釋咁多,你哋見到啲乜咪乜囉,見唔到咪唔好諗嗰啲嘢,唔好傻囉!」

三人行唔係冇可能

問到與阿詩關係變回好友?祖兒強調大家從來都是好友,亦有傾偈:「我哋真係唔係仇人嚟o架,信一次啦好嘛!(有冇機會變番以前三人行?)冇嘢冇可能o架,你哋想嘅話,驚你哋受唔住呀!(同阿詩、師兄都係朋友?)除咗家人咪就係朋友囉!」

另外,談及內地限酬令可有影響工作?她表示不知情:「嚟緊兩三個月都喺內地、台灣做嘢。(限酬令下賺少咗?)本身唔多嘅!(每季最多1,000萬人仔?)嘩,我未聽過呢個數目字囉,大佬,有冇搞錯!」

前言不對後語

昨日師兄出席活動談到日本行時,他反問記者:「我有去日本咩?睇到幅相話我去日本咋!」追問是否和祖兒同行時,他開始騰雞前言不對後語:「冇呀!我自己同啲朋友去咋!」還說有遇到千嬅但沒見到祖兒,因他沒有去看黃耀明演唱會。對於祖兒、阿詩「破冰合照」,他無奈說:「其實我覺得影張相好平常,喺一個開心嘅環境,大家一齊支持明哥。」