梁雪瑤高招搶分爆冷奪冠

《2018亞洲小姐競選》香港賽區決賽昨晚於大埔亞視錄影廠舉行。賽事一開始由10位候選佳麗穿三點式行Catwalk揭開序幕，當中以賴嘉瑩及李芷菱上圍最跌蕩，蘇頌筠則谷出心形胸，而大熱的張靜茵身材最均勻兼有腹肌。至於張右雨泳褲移位，幸力保不失，李芷菱臀部現橙皮紋，林孜沫則不慎下體現形。大會率先頒發首個獎項「IG人氣大獎」，由賽前獲得35,492個Like的李芷菱先拔頭籌奪得。

陳志雲發問苛刻

及後一眾佳麗換裝表演韓式女團舞蹈，惟服飾MK味濃，雖然她們露腰又露腿，但舞姿略為生硬。問答環節時，今年亞姐有別其他選美賽事，改由陳志雲、陳欣健、陳嘉容、梁佩瑚及顧紀筠組成的星級評判團隊發問問題，當中以陳志雲表現最苛刻！張右雨指今屆亞姐載歌載舞，與歷屆有所不同，志雲卻揶揄說：「係咪你年紀細咋？香港小姐好多年都係咁。」她即靦腆回應：「我係講亞姐呀，我哋仲要跳韓式可愛舞。」志雲繼續咬住唔放：「咁你即係話中國舞唔得？中國同韓國畀你揀一個，你好似有選擇困難症喎！」她答：「我係講我覺得自己係今晚冠軍呀！」

林孜沫（右）、張右雨（左二）及李芷菱（左）指梁雪瑤奪冠是實至名歸。	亞軍 張右雨（Gloria） 年齡：23歲 三圍：32B、25、36 張右雨行Catwalk時泳褲移位，幸未有走光。	季軍 林孜沫（Momo） 年齡：23歲 三圍：34B、27、38 林孜沫擺甫士時信心十足。

之後志雲又向李芷菱發功：「你有冇試過對住人笑，但係畀人話乞人憎呀？你係話高音嘅笑聲係噪音？其實有乜咁好笑呢？即係我鬧你，你仲嬉皮笑臉？」被窒到冇聲出的她惟有以笑遮醜，未幾志雲主動「腰斬」訪問，場面尷尬。

李芷菱連奪兩獎，但最終三甲不入。

張靜茵被視為大熱，可惜全晚冇獎。

大熱張靜茵捧蛋

經過六個環節，最後由梁雪瑤奪冠，張右雨及林孜沫分別奪得亞、季軍，李芷菱則連獲「最上鏡小姐」及「IG人氣大獎」，反觀曾參加過三台選美兼賽前大熱張靜茵，最終繼續捧蛋而回。

出爐冠軍梁雪瑤得獎後接受訪問，問到有否想過奪冠？她直言想過入三甲，如今奪冠實屬驚喜，並不覺自己爆冷：「我有身高優勢（1米73），對自己表現滿意，有信心。（慶幸問答環節遇到嘅唔係陳志雲？）都係。」亞軍張右雨被問到輸在哪方面？她說：「覺得冠軍好斯文同好Elegant（優雅），自己有時會跳跳紮冇咗儀態。（覺得志雲問答環節嗰part攞分？）又唔會，落到台都覺得自己答得唔好，儀態方面應該係零分。」而季軍林孜沫表示滿意賽果，大讚梁雪瑤奪冠實至名歸。