楊張新悅嫌棄P圖：膠面好核突！
名媛薛芷倫（Fanny）日前上載曾是死敵的袁詠儀與楊張新悅合照，豈料楊張新悅昨日公開爆Seed勁彈：「膠面好核突！」不甘茅頭直指自己的Fanny反擊：「我唔想再同呢個人講落去！」
靚靚與楊張新悅早年合作拍攝電影《戇星先生》鬧不和，兩人早前同場與薛芷倫（Fanny）合照一笑泯恩仇。楊張新悅昨日出席活動時提及破冰一事，明言覺得P圖效果不自然：「張相P到我哋好膠面，其實我哋皮膚本身都好好，唔使P，膠面好核突！依家唔需要住，過多廿年先！」
她坦言已20年沒見過靚靚：「拍完戲之後冇見過，我都十幾年冇拍戲，當年嘅事唔記得啦！」（今次係咪Fanny拉攏破冰？）從來都冇需要話拉攏，只係依家大家都興自拍，影完呢個就影嗰個，我只係好傷心張相太膠面。」
薛芷倫火爆反擊：唔想同呢個人講
記者致電Fanny，她說：「我用咗電話上嘅美顏Apps影Selfie，冇P過圖，我唔會做啲唔尊重人嘅事，亦都冇P人哋個樣。（楊張新悅言下之意，好似話你P圖喎？）我唔想再同呢個人講落去，當晚係一個開心飯局，大家傾偈又玩自拍，影完大家有睇相，我唔想無事生非，唔想再回應。」問到會否絕交？她沒好氣說：「總之都係嗰句，能夠同枱食飯、都係緣分，我隨緣啦！」之後再補充說：「大家都咁忙，咁多正經嘢做，佢忙湊細路，我忙投資生意，一幅自拍照何足掛齒，希望佢擺低件事，只不過一張自拍照，希望佢Let it go。」
杏兒真空上陣
另外，同場有藝人胡杏兒及兩位好姊妹黃智雯與胡蓓蔚，三人齊齊穿粉紅色套裝，真空上陣的杏兒笑言已全方位測試，確保不會走光。
