劉芷希為保飯碗晚晚做骨妹
早前在電影性感上陣而人氣急升的藝人劉芷希，去年由馬來西亞來港發展，為了其模特兒生涯，她一直花心思保養「生財工具」，更鑽研出獨門秘訣！
珠寶小姐出身的藝人劉芷希（Kimmy），自小在馬來西亞長大，去年毅然來港發展，加入無綫展開其演藝事業，早前還與李思捷合演電影，因有性感演出而引起關注，她說：「我媽咪係香港人嚟，呢度係我其中一個屋企，所以好想返嚟發展。」又指父母十分開通，支持其入行決定：「佢哋覺得我大個女，應該由自己決定人生，所以當初我選擇做藝人，佢哋都好贊成。」
身材夠高 工作滾滾來
問到初入行時可有經濟壓力？Kimmy自認幸運，一直有工開，故仍能維持生計：「我喺馬來西亞做過模特兒，可能有1米75高，喺呢行都算有優勢，所以容易接到為品牌行天橋嘅工作。（有冇發生過蝦碌事？）最多都係行行吓甩鞋，但問題不大，唔會影響發揮嘅。」
對於模特兒來說，維持弗爆身材尤其重要，一雙美腿更是「生財工具」之一，Kimmy自爆有獨門保養心得：「每晚我都會用精油按摩對腳嘅穴位，再拉筋放鬆吓。有時候做瑜伽練線條，但一定唔會跑步，怕跑太多對腳會有肌肉。同埋我會好小心唔好撞親，費事留疤痕就唔好睇。」為了保養其44吋煞食長腿，認真費盡心思！
泳衣：Nami