譚耀文做反有辦睇栢天男自閉「奸」出位
藝人譚耀文落力演出新片，拍攝期間不慎受傷，仍拚搏完成「任務」，猶幸電影的內地票房輕易衝上3億人民幣，可謂飲得杯落。而戲中扮演大奸角的新人栢天男，視電影為「考牌之作」，更獲睇好有力「升呢」！
阿譚於林德祿執導電影《L風暴》內扮演犯罪集團首腦，幫客戶洗黑錢達10億以上，角色甚富挑戰性。相比以往接演的反派，今次角色演來比較紮實，他更加能盡情發揮：「個古仔係真人真事改編，我個角色仲有『真人版』添，所以開拍前我上網搵過啲資料作參考，大概知道呢個人嘅生平。至於角色造型方面，最特別係林導安排我經常西裝筆挺現身，好似煞科嗰場槍戰戲，我更以一身紫色西裝開工。」
今次演出阿譚可謂「奮不顧身」，拍攝重頭槍戰戲時被「火屎」擦過受了輕傷：「做嘢嗰時唔覺，返到屋企咪知囉！不過只求拍出一部獲觀眾喜歡嘅戲，我就開心。（獎項提名？）呢啲嘢冇特別諗，隨緣啦！」而電影於內地錄得3億人民幣票房，香港亦有逾1,700萬，成績不俗，他可算辛苦有價。
林德祿讚不絕口
而首次參演「風暴系列」電影的栢天男則向高難度挑戰，扮演一名患有自閉症兼有暴力傾向的孤兒，雖然智商高但一邊耳仔只餘三成聽力。有「缺陷」的角色對新人來說絕對是「考牌之作」，幸其表現令林導滿意，還誇口讚他說：「佢係白紙一張，容易塑造，嚟緊應該好多內地製作搵佢o架喇！」栢天男亦不忘多謝阿譚於片場不時指點，又與他研究普通話對白，令他獲益良多。
場地：Factory 99