薛家燕忍淚悼念吳君麗
粵劇名伶吳君麗前日離世終年84歲，不少圈中友好聞訊深表哀痛，薛家燕前晚錄影《流行經典50年》期間得知噩耗，大感難過，一度想哭出來，最終忍痛完成工作，她說：「真係好難過，因為麗姐（吳君麗）睇住我大，我入行冇幾耐第二套電影就係同佢拍，唉……佢好錫我，我個仔結婚，佢話一定嚟飲，知道佢走好難過！頭先都想喊出嚟，但係要做節目，冇辦法。麗姐係個好好嘅前輩，對粵劇同電影都有好大貢獻，佢慈祥嘅面孔永遠留喺我腦海中。」她已與陳寶珠聯絡過，大家也感到難過。
粵劇家阮兆輝昨在活動中表示大前日始獲悉對方病重，因忙於演出及講課未能到醫院探望：「尋晚我臨演出前就收到佢嘅死訊。」他與吳君麗對上一次見面已是多年前：「我1956年開始同麗姐合作，但佢息影後就好少見，有需要嘅話，我哋班行家一定幫忙，但未知佢屋企人會點安排。」
鄭欣宜曾跟吳君麗合作處境劇《畢打自己人》，大讚前輩全無架子、值得敬佩，又會跟他們一班後生仔食飯，相處好舒服，對前輩離世大表難過。另外，謝雪心則表示麗姐是突發性的病：「係短短兩個月嘅事，之前見佢都好精神。」