陳煒撐千嬅準時交戲冇NG

歌手楊千嬅相隔17年再拍無綫劇甚為惹火,有指她影劇兩邊同時趕戲,令檔期難於遷就致頻頻遲到,有傳同劇對手陳煒成「重災區」。昨日陳煒否認傳聞,更為千嬅護航,激讚好專業。

千嬅與周柏豪、黃浩然及陳煒主演的劇集《多功能老婆》前晚在將軍澳舉行煞科宴,劇集拍完,但卻傳出千嬅拍劇的同時又要為電影《麥路人》開工,試過48小時冇瞓,致經常遲到,令劇中對手戲最多的陳煒最遭殃,有指陳煒試過等到「火都嚟」。但陳煒否認傳聞,並說:「冇咁嘅事,我知佢踩得好辛苦,但佢都好準時,非常專業,冇NG過,記得有一次佢要讀三頁紙嘅對白,都可以一Take過,係一個非常好嘅對手。」

冇見囝囝成個月

不過,黃浩然卻在煞科宴「爆料」,指千嬅不停NG兼傻笑,千嬅即反駁:「你咪亂講,我冇係咁NG,一秒鐘都唔嘥o架!我都想早啲返屋企。」又透露早前受超級颱風山竹影響,尚有一日才拍完,又指今次劇集拍了五個多月,笑言朋友以為她拍70集長劇,又試過為拍攝喊足四個鐘眼都腫,過程辛苦但開心,故亦感不捨。她自言這段時間劇接戲也算是好訓練,笑言不用熱身便可埋位。問到會否再拍劇,她指要問准兒子:「因為暑假冇機會陪佢,阿仔話以後換佢拍戲,我留喺屋企,我同佢講Sorry。(點補償?)今次係好機會話畀佢知每個人都有工作,佢將來都有,不過之後安排時間會好啲,今次真係成個月見唔到。」

另外,相隔19年再度拍劇的黃錦燊,並未生疏,又表示期待開續集繼續與黎燕珊「鬥戲」!黎燕珊則笑言與劇中女兒朱晨麗日對夜對,被指很似樣,又說拍攝竹戰戲時,才知道陳煒是「高手」。